Presidenti amerikan, Donald Trump përshëndeti sot kancelaren gjermane, Angela Merkel për organizimin e një samiti ”fantastik” të G20-ës edhe pse ai u shënua edhe nga manifestime të dhunshme në rrugët e Hamburgut.
“Ju keni qenë e mrekullueshme dhe keni bërë një punë fantastike për këtë samit, që nuk pati asnjë ndërprerje pavarësisht disa personave”, theksoi ai, ndërkohë që bashkëshortja e tij Melania u bllokua dje në residencën e saj për shkak të manifestimeve.
Kancelarja gjermane, Angela Merkel, e cila mban këtë vit presidencën e radhës të G20-ës, i cilësoi të papranueshme manifestimet e dhunshme që u zhvilluan në kuadër të samitit të drejtuesve në Hamburg, në Gjermani.
“Manifestimet e dhunshme rrezikojnë jetën (….) dhe për këtë arsye janë të papranueshme”, deklaroi ajo dje në një konferencë shtypi.
“Shumë automjete të policisë u dogjën, rreth 160 policë u plagosën lehtë dhe të paktën 45 persona u arretuan”, sipas policisë.
Përballë incidenteve të shumta, 20 000 policët e vendosur tashmë në qytet kanë kërkuar forca shtesë.
