Nga FOTJAN SOFTA /
Një profesionist i lirë sot detyrohet të jetojë me qira në apartamentin e një trafikanti droge. Ndërkohë, SPAK dhe Banka e Shqipërisë me politikat e tyre po “legjitimojnë” pastrimin e parave në ndërtim.
Operacioni i fundit ku u sekuestruan 25 milionë euro pasuri është vetëm maja e ajsbergut: në çdo dosje të SPAK shfaqet lidhja mes korrupsionit, drogës dhe ndërtimit. Ky realitet ka fryrë artificialisht çmimet e apartamenteve në Tiranë dhe qytetet e mëdha, duke i bërë ato të paarritshme për familjet e zakonshme.
Sot, një trafikant droge blen një apartament pa asnjë pengesë e pa i kërkuar askush llogari për burimin e parave. Në të njëjtën kohë, bankat i vështirësojnë kriteret për shqiptarët e ndershëm që duan të blejnë shtëpi me kredi.
Pra, një çift i ri shqiptar ka vetëm dy zgjedhje:Të
– Të jetojë me qira ndoshta në banesën e një trafikanti.
– Të blejë me punë dhe sakrifica shume vite duke bërë disa punë një banesë për tu strehuar. Po një punonjës policie sa duhet të punojë që të blejë një banesë?
Ky është realiteti që politikat po imponojnë: “përkrahje” për trafikantin, vështirësi të shumta për qytetarin.
Koha është për reagim qytetar – përballë një situate për të cilin heshtim.
Mbi 60 mijë familje të qarkut të Tiranës nuk kanë shtëpi në pronësi, në kushtet kur stoku i apartamenteve bosh është shumë herë me i lartë. Të dhënat e detajuara të CENS-it treguan se në 5 bashkitë e këtij qarku janë 85 mijë banesa bosh, nga të cilat 66% janë apartamente në pallate.
Rezultatet e detajuara të Censit të publikuara nga INSTAT, treguan se në 5 bashkitë e Qarkut Tiranë jetojnë në total 247.466 familje me 758.513 banorë, por vetëm 186.870 familje ose janë pronarë ose në proces të marrjes së aktit ligjor.
Janë 60,596 familje pa banesë në pronësi në një kohë që vetëm në këtë qark janë 85.457 banesa bosh.
Praktikisht 26.6% e totalit prej 321,821 banesave që janë në këto 5 bashki, janë të pabanuara. Përkundër bumit të ndërtimeve në shumëkatëshe, janë 56 mijë apartamente në pallate bosh në këtë qark, nga të cilët 40 mijë apartamente bosh janë vetëm në Bashkinë Tiranë.
