Nga AGIM BASHA /
Mund të shkruaja akoma shumë vargje
Mund të këndoja ende me qindra këngë
Mund të them shumë lutje, për ju
Edhe pse një vit, është duke rënë.
Shtatoret të ngre edhe më lart.
Mundem, varreve që heshtën, t’i ulem në gjunjë
Malet në vendlindje t’i gjej në çdo hartë.
Dashurive lule tu dhuroj, t’i fal çdo mëkat.
Mund të flas akoma, për fate njerëzorë.
Mund të ligjëroj si bilbili në maj.
Për shpresën dhe të nesërmen që vjen.
Mund t’u them se, adhuroj sytë e saj!
Tani pres që lutjen me mua të bashkoni edhe ju
Pres që Paqes t’i thurni një kurorë
Dashurinë njerëzore ta këndoni si Hymn
Dhe unë zemrën time, t’ua jap në dorë!
Urimet më të mira për Vitin e Ri 2024!
