Sulmi i Shtetit Islamik në një burg në Sirinë verilindore dhe luftimet që pasuan midis xhihadistëve dhe forcave kurde kanë marrë jetën e 332 personave që nga 20 janari, sipas një raporti të ri të publikuar nga Observatori Sirian për të Drejtat e Njeriut.
Përleshjet sporadike vazhduan të shtunën midis kurdëve të mbështetur nga SHBA dhe anëtarëve të ISIS-it që u arratisën nga burgu Guyran në qytetin e Hasaka. Në këtë burg mbaheshin të paktën 3500 xhihadistë nga vende të ndryshme.
Observatori tha se gjithsej 332 njerëz ishin vrarë në përleshjet që nga sulmi i 20 janarit, më i madhi që IKF kishte nisur që nga humbja e saj tre vjet më parë: 246 ishin xhihadistë, 79 ishin anëtarë të forcave kurde dhe shtatë ishin civilë. Rritja e numrit të të vdekurve vjen për faktin se shumë trupa u gjetën brenda godinave të burgut dhe në ato fqinje, gjatë operacionit të “spastrimit” të nisur nga forcat kurde.
Drejtori i Observatorit, Rami Abdel Rahman, tha se ekzistonte mundësia që numri të rritet më tej, pasi shumë luftëtarë kurdë ishin plagosur rëndë dhe po trajtoheshin në gjendje kritike.
Forcat kurde rifituan kontrollin e pothuajse të gjithë burgut dhe arrestuan qindra xhihadistë që kishin arritur të arratiseshin. Megjithatë, dhjetëra anëtarë të IK-së janë ende të fshehur në anën veriore të burgut, në një vend ku është e vështirë të arrihet edhe nga ajri.
