Pas mbledhjes së sotme të ministrave të jashtëm të vendeve anëtare të Aleancës së Atlantikut të Veriut, Xhaçka tha se ka ardhur koha që të bëhet më shumë për të mbrojtur Ukrainën nga sulmi rus.
BRUKSEL – Ministrja e Punëve të Jashtme e Shqipërisë Olta Xhaçka bëri me dije se vendet anëtare të NATO-s kanë paditur Rusinë në Gjykatën Ndërkombëtare Penale të Hagës për krime lufte në Ukrainë. Pas mbledhjes së sotme të ministrave të jashtëm të vendeve anëtare të Aleancës së Atlantikut të Veriut, Xhaçka tha se ka ardhur koha që të bëhet më shumë për të mbrojtur Ukrainën nga sulmi rus. Ajo garantoi gjithashtu mbështetjen e shtetit dhe popullit shqiptar për Ukrainën.
“Në takimin e jashtëzakonshëm të Ministrave të Punëve të Jashtme të vendeve të NATO-s sot u konfirmua sërish me forcë vendosmëria e aleatëve për të mbështetur popullin e Ukrainës në luftën heroike që ka fituar admirimin dhe respektin e të gjithë botës.
Shqipëria ka luajtur një rol domethënës në këto përpjekje për të mbështetur Ukrainën, edhe me ndihmë materiale konkrete, por sidomos në fushën e diplomacisë, ku pardje siç keni pasur mundësinë ta ndiqni u arrit një fitore vërtet e rëndësishme duke miratuar me shumicë absolute votash një rezolutë të bashkësponsorizuar nga Shqipëria ku i kërkohej Rusisë t’i japë fund luftës.
Theksova në takim se duhet bërë më shumë, të bëhet më shumë që të ndalet sulmi i pajustifikuar mbi Ukrainën dhe mbi sigurinë e sistemin ndërkombëtar.
Unë dua t’i garantoj qytetarët shqiptarë, të cilët kanë treguar gjatë këtyre ditëve një solidaritet të jashtëzakonshëm me popullin ukrainas duke mbledhur ndihma, që roli që ka luajtur Shqipëria është vlerësuar maksimalisht nga aleatët dhe që bashkë me ta do të vazhdojmë punën e mirë që kemi bërë gjatë këtyre javëve në Këshillin e Sigurimit, në NATO, në OSBE, në Këshillin e Europës dhe në çdo forum ndërkombëtar ku mund të ofrojmë mbështetjen tonë për popullin ukrainas, lufta e të cilit nuk është thjesht një luftë për mbijetesën e Ukrainës por një luftë për paqen e sigurinë në kontinentin evropian”, tha ministrja Xhaçka.
