Çfarë raporton agjencia ndërkombëtare e lajmeve në analizën e saj për valën e të nxehtit
“Ngrohja globale paraqet rrezik shkretëtirëzimi për zonën më të gjerë të kryeqytetit grek”, raporton agjencia “Bloomberg” në publikimin e saj, duke theksuar se më shumë zjarre do të thotë më pak kohë për rigjallërimin e ekosistemit.
“Athinasit e goditur nga zjarri po përgatiten për temperatura rekord këtë javë. Por një fatkeqësi ekologjike afatgjatë kërcënon djepin e qytetërimit perëndimor: kryeqyteti grek rrezikon të kthehet në shkretëtirë”, thuhet në botim. “Zjarret kanë shpërthyer që nga java e kaluar në rajonin e gjerë të Atikës, duke shkatërruar shtëpi dhe duke detyruar banorët dhe turistët të kërkojnë siguri në plazhet e afërta.
Me ngrohjen e klimës, vapa ekstreme dhe zjarret po bëhen gjithnjë e më të shpeshta, duke e privuar kryeqytetin grek nga ullishtat dhe pyjet me pisha që kanë nevojë për kohë për t’u rigjeneruar.Ndryshimi i klimës, i nxitur nga emetimet e karburanteve fosile, po rrit intensitetin dhe kohëzgjatjen e valëve të të nxehtit të verës në të gjithë hemisferën veriore, duke ngritur shqetësimet se disa zona të planetit së shpejti mund të bëhen të pabanueshme.
Ajri i nxehtë nga Sahara po shkon drejt jugut, duke shkaktuar kërdi ekologjike prej kohësh në vende si Sudani dhe Çadi, skaji verior i shkretëtirës së nxehtë, dhe tani po kërcënon Evropën. Ndërsa nxehtësia ekstreme intensifikohet në Evropë, favorizohen zjarret.
Greqia është ndër vendet e Evropës Jugore dhe Juglindore – përfshirë Spanjën, Portugalinë, Italinë, Bullgarinë dhe Rumaninë – që janë të prekshme ndaj shkretëtirëzimit, pasi temperaturat rriten dhe reshjet ulen, duke nxitur shfaqjen e zjarreve.
Temperaturat maksimale për Greqinë kontinentale parashikohen të arrijnë deri në 47 gradë Celsius. Kjo do të ishte e barabartë me rekordin e të gjitha kohërave të vendosur në Athinë në 1977 dhe potencialisht do t’i afrohej rekordit evropian prej 48.8 gradë Celsius të vendosur në Siçili dy vjet më parë. “Kohët e vështira nuk kanë mbaruar ende,” paralajmëroi të enjten kryeministri grek, Kyriakos Mitsotakis, i cili, në terma afatgjatë, kërkon të rishpërndajë burimet për ripyllëzimin dhe të marrë masa parandaluese në Atikë.
“Mbi një e treta e territorit grek është në rrezik të lartë shkretëtirëzimi, sipas planit të veprimit të Ministrisë së Bujqësisë në vendin tonë. Ndërsa bujqësia intensive është një kontribuues i madh, temperaturat më të larta dhe reshjet më të ulëta po përshpejtojnë erozionin e tokës,” komenton Bloomberg.
