Thatësira historike në Bririn e Afrikës, e cila la rreth 4.3 milionë njerëz në nevojë të menjëhershme për ndihmë humanitare dhe rreth 43,000 të vdekur vitin e kaluar në Somali, nuk do të kishte ndodhur pa ndryshimet klimatike, sipas hulumtimit shkencor të botuar sot.
“Ndryshimet klimatike për shkak të aktiviteteve njerëzore i kanë bërë thatësirat në Bririn e Afrikës rreth 100 herë më të mundshme,” tha World Weather Attribution (WWA), një rrjet global shkencëtarësh që hulumtojnë lidhjen midis ekstremeve klimatike dhe çrregullimit të klimës.
Që nga fundi i vitit 2020, vendet në Bririn e Afrikës – Etiopia, Eritrea, Somalia, Xhibuti, Kenia dhe Sudani – po përballen me thatësirën më të madhe në 40 vjet.
Pas pesë sezoneve me shi pa reshje të konsiderueshme, të korrat u shkatërruan dhe miliona bagëti ngordhën. Sipas OKB-së, 22 milionë njerëz janë në rrezik nga uria në Etiopi, Kenia dhe Somali.
Siç theksuan 19 shkencëtarët që shkruan hulumtimin, ndryshimi i klimës kishte “efekte të vogla në reshjet vjetore” në rajon. Por ndikoi ndjeshëm në rritjen e temperaturës, e cila është përgjegjëse për rritjen e madhe të avullimit të transpirimit që çoi në tharje rekord të dherave dhe bimëve.
“Ndryshimi i klimës ka shkaktuar këtë thatësirë të rëndë dhe të paprecedentë,” tha Joyce Kimutai, një klimatologe keniane me Shërbimin Meteorologjik të Kenias që mori pjesë në hulumtim. Ajo dhe ekipi i saj arritën në përfundimin se nëse temperatura do të kishte qenë 1.2 gradë Celsius më e ulët, kombinimi i reduktimit të reshjeve dhe avullimit “nuk do të kishte çuar në thatësirë”.
