Për të qenë në drejtimin e duhur: Apolitikisht, psikologjikisht dhe moralisht

Opinion

artani ne focus-1Mos e krahasoni kurrë veten me askënd. Mos e paragjykoni veten. Si çdokush, edhe ju keni pikat e forta, pikat e dobëta. Për engjëjt thuhet se janë të përkryer, por ju nuk jeni të tillë! Mos harxhoni kohën me çdo gjë që ju duhet të bëni, por përqendrohuni të zbuloni prirjen tuaj, talentin tuaj, dhe të zhvilloheni më tej, të zhvilloheni pa ndalur, të zhvilloheni me përkushtim. Të tjerat lërjani kohës. Dhe në çdo rast synoni të bëni gjërat që dini t’i bëni më mirë, dhe sidomos gjërat që doni t’i bëni më shumë. Nuk mjafton vetëm besimi për të arritur synimet në jetë. Besimi tek vetja, thotë Viktor Hygo, është fuqia e dytë. E para është “TË DUASH”. Vetëm kështu, vetëm duke dashur, do arrish ta kesh jetën në një rend dhe trend  pozitiv, ku gjithçka, edhe kohën, edhe punën, edhe jetën, edhe dashurinë, do të mund t’i kesh në kontroll…

Në çdo situatë buzëqeshni! Jo sepse jeta nuk ka vështirësi dhe probleme. Jo sepse jeta shkon vaj dhe shpesh është mizore. Jo sepse errësira shpesh nuk sundon shpirtrat tanë. Por sepse, megjithatë, është bukur të ekzistosh; është magji të jetosh dhe dashurosh, pavarësisht fatit të keq dhe përvojave. Buzëqesh, sepse ti ke zgjedhur të luftosh për të qenë i lumtur, sepse ke kurajë të jesh mirënjohës. Mirënjohës për gjërat e mira që ke, mirënjohës që, përtej problemeve, jeta të ka kursyer disa probleme të tjera, të cilat nuk i ke, por mund t’i kishe. Buzëqesh, që fytyra jote e lumtur, duke ndjekur zemrën e gëzuar, të duket si dritë; dritë e bardhë mes errësirës…

Artan MULLAJ  –  Asgjë nuk ndodh rastësisht, por ndodh për një arsye të caktuar, pjesë e së cilës jeni edhe ju… Ju jeni njëherësh shkak edhe pasojë e gjithçkaje që ndodh në jetën tuaj. Vlerësoni detajet. Vlerësoni çdo personazh që ndeshni në rrugë, dhe merrni seriozisht mendimet e tyre, arritjet e tyre, talentet e tyre. Mes tyre do të ketë patjetër njerëz që mendojnë dhe ndjejnë si ju… Këta do t’ju vlerësojnë dhe ndihmojnë të ecni përpara…

Vlerësojini edhe ju të tjerët për atë çka janë realisht, jo për atë çfarë duken. Shpirti njerëzor është pjesa që nuk duket e ajsbergut tek njeriu. Pjesa më e madhe dhe më e rëndësishme e tij. Ndjesitë e të tjerëve janë të pakapshme nga shqisat tona, kështu që përpiquni shumë të kuptoni personalitetin e tyre, ndjenjat e tyre, duke synuar përtej asaj çfarë duken, veshin, thonë, e mënyrës si e thonë… Duhet të jeni dashamirës në vlerësimet për ta, përshkrimet, sugjerimet; kujdesuni të kuptoni nevojën e tyre për t’u ndjerë të vlerësuar, dhe mos kurseni dashurinë, mirësinë, ëmbëlsinë për njerëzit që ju rrethojnë, për miqtë, bashkëpunëtorët dhe partnerët.

Mos i shpërfillni kurrë thirrjet e zemrës. Ndiqini! E mundimshme, por kjo është rruga ku duhet të shkoni: më e mira, më e drejta, më e vërteta, më e sigurta. Ju jeni copëza energjie jetësore, të destinuara të digjeni për këtë gjë, për këtë rrugë, për këtë drejtim. Kjo është rruga e ëndrrave, përmbushja juaj, arsyeja pse ekzistoni, pse jeni thirrur, pse jeni këtu… Dhe në këtë rrugëtim mos reshtni së ëndërruari, mos reshtni së shpresuari, mos ndaloni kurrë në besimin tuaj, për asnjë arsye. Sepse jeni në drejtimin e duhur…

Jini të sinqertë! Gjithmonë! Jeta nuk është thjesht një dhuratë për ju; jeta është një provë. Sepse është një provë, keni detyrim të përpiqeni dhe luftoni, pa pushim, por çdo herë duhet të jeni të ndershëm me veten tuaj, me njerëzit tuaj, me të gjithë… Gjithkush ju do të sinqertë! Ndaloni frymën një moment, dhe përfytyroni ç’zhgënjim do të jeni për njerëzit nëse ata kuptojnë që nuk  jeni të sinqertë me ta. Njerëzit që ju rrethojnë duan ndershmërisht  të vërtetën prej jush. Mendoni që çdo njeri dëshiron në çdo rast të dëgjojë nga goja juaj vetëm atë. Dhe mos harroni kurrë që sinqeriteti është themeli i karakterit tuaj, dhe Ju vetë jeni shumatorja e opinioneve që kanë të tjerët për Ju…

artani ne focus-2