Janë zbuluar 16,000 raste jashtë Afrikës, ku kjo sëmundje ka arritur në 75 vende
Për herë të dytë në vetëm dy vjet, Organizata Botërore e Shëndetësisë po ndërmerr një hap vendimtar, duke lëshuar një alarm – në nivel ndërkombëtar – për një sëmundje. Këtë herë, është lija e majmunit që brenda pak javësh ka infektuar dhjetëra mijëra njerëz në dhjetëra vende.
“Ne po përballemi me një shpërthim të virusit në të gjithë botën. Sëmundja po përhapet me shpejtësi, por deri më tani nuk dimë shumë”, tha kreu i OBSH-së. Që nga viti 2007, është hera e shtatë që Organizata lëshon një alarm global, ku rasti më i fundit është ai i pandemisë. Megjithatë, organizmat ndërkombëtare kanë kritikuar kriteret me të cilat OBSH vendos të shpallë gjendjen e gatishmërisë së përgjithshme. Në një takim në qershor, këshilltarët e OBSH-së arritën në përfundimin se lija e majmunëve është një kërcënim në rritje.
Deri më tani, 16,000 raste janë identifikuar jashtë Afrikës, pesë herë më shumë se në qershor, një muaj më parë
Shumica e rasteve janë regjistruar tek meshkujt homoseksualë që kryejnë marrëdhënie seksuale me njëri-tjetrin.
SHBA: Rastet e para të lisë së majmunit tek fëmijët. Autoritetet shëndetësore amerikane kanë konfirmuar për herë të parë raste të lisë së majmunëve tek fëmijët. Ata janë një foshnjë në Kaliforni dhe një foshnjë jo-rezidente në SHBA, sipas njoftimit zyrtar. Të dy rastet nuk janë të lidhura dhe, sipas Qendrave për Kontrollin dhe Parandalimin e Sëmundjeve (CDC), ka të ngjarë të jenë infeksione intrafamiljare. Dy fëmijët po trajtohen dhe janë mirë, tha CDC.
Agjencia Evropiane e Barnave miraton vaksinën kundër lisë së majmunit
Agjencia Evropiane e Barnave (EMA) tha se ka miratuar përdorimin e një vaksine kundër lisë për të zgjeruar përdorimin e saj kundër përhapjes së lisë së majmunëve, e cila mund të shënojë nivelin më të lartë të alarmit të OBSH-së.
Drita jeshile e EMA-s vjen ndërsa bota pret rezultatet e ekspertëve pas një takimi dje, të enjten, të komitetit të urgjencës të OBSH-së, drejtori i përgjithshëm i të cilit tha se ishte i shqetësuar nga rritja e numrit të rasteve të lisë së majmunëve në mbarë botën.
Vaksina Imvanex, nga kompania daneze Bavarian Nordic, është miratuar në BE që nga viti 2013 për parandalimin e lisë. Ai u miratua kundër lisë së majmunëve për shkak të ngjashmërisë midis këtij virusi dhe virusit të lisë. Drejtori i përgjithshëm i OBSH-së, Tedros Adhanom Ghebreyesus tha dje se ishte “i shqetësuar” nga rritja e numrit të rasteve të lisë së majmunëve teksa hapi një takim të komitetit të urgjencës, duke kërkuar këshilla ekspertësh. Kreu i OBSH-së është përgjegjës për shpalljen e një emergjence të shëndetit publik me shqetësim ndërkombëtar, niveli më i lartë i alarmit të organizatës shëndetësore, bazuar në rekomandimet e komitetit.
